Ака уйăхĕн 23-мĕшĕнче Хурамал территори пайĕн ĕçченĕсем тĕп лапамра субботник ирттернĕ. Ял сăнне симĕс тĕс кĕртес тесе вĕсем йывăçсем лартнă. Пĕрлехи ĕçе ял-йыш та хутшăнма кăмăл тунă, туслăн вăй хурса вĕсем чылай тĕп хунавсем лартнă.

Йывăç лартмалли вырăнне те ăнсăртран суйласа илмен. +ак площадкăранах спорт ăмăртăвĕсем старт илеççĕ, культура мероприяти-йĕсене те кунтах ирттереççĕ, апла пулсан ку лапамра кăтартуллă йĕрке тата чăн-чăн илем хуçаланмалла. Çакна шута илсе, малашлăха пысăк шанчăкпа пăхса, активистсем пĕлтерĕшлĕ утăм тунă - çак вăхăтра лартнă чăрăшсем тымар илсе аталанса каясса шанса, чылай тĕп лартса хăварнă. Кунта кĕçех чăрăшсен аллейи ешерĕ!

Акан 25-мĕшĕнче Хурамал территори пайĕн начальникĕ Валерий Евграфов пуçарнипе активистсен тепĕр ушкăнĕ çанталăк йăпе-сапа тăнине пăхмасăр Чăрăшкасси ялнелле хывăннă автоçул хĕррипе йывăçсем лартнă, посадкăра чăрăшсемпе хырсем хунав илĕç.