Чăваш Тимешĕнчи шкулта ĕлĕкрен пыракан ырă йăла çирĕпленсе юлнă, кунта кашни çулах чăваш халăхне çутта кăларнă Иван Яковлев çуралнă кун 4-мĕш класра вĕренекенсене пионера илеççĕ.

 Кăçал та манăçа кăлармарĕç çак йĕркене. Паллă кун умĕн кĕçĕн класс ачисем, Иван Яковлевич халалне асра тытса, сывă та хăюллă, ăслă-тăнлă та çирĕп кăмăллă, Тăван çĕршыва юрăхлă çын пулса ÿсме сăмах пачĕç, ачасене хĕрлĕ галстук çакса ячĕç.

Ахальтен суйласа илмен çак куна. Çĕршыв историйĕн паллă страницисене уçса пăхсан та, иртнĕ ĕмĕрте, Совет Союзĕ пулнă саманара, шăпах çак вăхăтра, ака уйăхĕн 22-мĕшĕнче çуралнă, пролетариатсен çулпуçĕ шутланнă Владимир Ленина асăнса, шкул ачисене пионерсен ретне çырăнтарнă пулнă. Чăваштимешсем çак датăн пĕлтерĕшне çĕнетсе ăна чăвашсен патриархĕпе И.Я. Яковлевпа çыхăнтарнине тата пионерсен юхăмне тепĕр хут чĕртсе аталатарнине ырламалла кăна.