Кăçалхи ака уйăхĕн 16-мĕшĕ Пысăк Упакасси ялĕн историйĕнче ĕмĕрлĕхех çырăнса юлĕ. Çак кун Серафим Саровский Преподобнăй ячĕпе çĕклесе лартнă храм валли ятарласа шăратса илсе килнĕ чансене сăвапланă.

Православи тĕнĕн йăли-йĕркине Йĕпреçри чиркĕвĕн настоятелĕ Петр атте туса ирттернĕ. Кĕлĕсем вуланă хыççăн чансене - вĕсем 7 - Турă шывĕпе сапса сăвапланă. Малашне чансен кĕмĕл янравĕ ял çийĕн çичĕ сасăпа юхса саланĕ.

Чансене ял-йыш, тăван тăрăхран урăх хуласемпе çĕршывсене саланнă ентешсем, кÿршĕллĕ ялсенче пурăнакансем тата предпринимательсем укçа-тенкĕ пухса парса пулăшнипе туяннă.

Чан сасси – Турă сасси. Çак сасă мĕн авалтан халăха  чĕнсе чиркĕве йыхравланă. Петр атте чиркÿ патне пуçтарăннă ял-йыша чансене çапса пăхма пил панă. Чансен пĕрлехи  янăравлă кĕвви çынсен чĕрисенче ĕненÿ çуратĕ, чунĕсене савăнăçпа çутăлăх парĕ.

Анна Евграфова