Шупашкарта пурăнакан 54 çулти хĕрарăм, медучрежденире администраторта ĕçлекенскер, Интернетри Максима шанса 7 миллион тенкĕ куçарса панă. Пăтăрмах пирки вăл йĕрке хуралçисене темиçе кун каялла пĕлтернĕ.

Хĕрарăм каласа кăтартнă тăрăх, вăл пуш уйăхĕн пуçламăшĕнче паллашу сайтĕнче Максим ятлă çынпа çыру çÿретме тытăннă. Кăштахран хайхискер хĕрарăма криптобиржăра укçа ĕçлесе илме май пур тесе ĕнентернĕ.

Камăн пуяс килмеç-ха ĕнтĕ?! Малтанласа хĕрарăм 70 пин тенкĕ инвестици хывнă. Кăштахран пысăкран та пысăк сумма хума тытăннă. Юлашкинчен банка хваттерне 4,5 миллион тенкĕлле салука хывнă.

Криптобиржăна хĕрарăм пĕтĕмпе 7 миллион тенкĕ ытла хывнă. Хăйĕн пухса пынă укçисĕр пуçне тата кредит, пĕчĕк займ илнĕ, пĕлĕшĕсенчен ыйтса кивçене кĕрсе кайнă. Интернетри Максим ырă шухăлă пулманнине ăнлансан тин хайхи хĕрарăм полицие çул тытнă...